Галоўная / Навiны / Навiны раёна
20.02.2020

Новы праект трансгранічнага супрацоўніцтва будзе рэалізаваны паміж Ашмянамі і гмінай Сувалкі

     Дэлегацыя з гміны Сувалкі Рэспубліка Польшча з рабочым візітам наведала Ашмянскі раён. Вынікам сустрэчы старшыні райвыканкама Уладзіслава Гершгорына з войтам гміны Збігневам Мацкевічам стала падпісанне дадатку да Пагаднення аб супрацоўніцтве.
     - Партнёрскія сувязі ў нашага раёна з гмінай Сувалкі трывалыя і правераныя часам — - адзначыла падчас сустрэчы намесніца старшыні райвыканкама Галіна Люткоўская. – Дзякуючы сумеснаму ўдзелу ў праекце міжнароднай тэхнічнай дапамогі «Супрацоўніцтва — Дзейнасць — Будучыня» ў межах праграмы трансгранічнага супрацоўніцтва ў 2015 годзе ў Ашмянах быў пабудаваны сучасны стадыён. Тады ж быў пракладзены мост дружбы паміж хлопцамі з нашага раёна, якія пабывалі ў Польшчы, і моладдзю з суседняй краіны.
     Новым крокам у партнёрскіх узаемаадносінах Ашмянаў і гміны Сувалкі стане праект "Культура аб'ядноўвае народы«, які рэалізуецца па праграме трансгранічнага супрацоўніцтва» Польшча – Беларусь – Украіна" Еўрапейскага інструмента суседства.
     У рамках праекта запланавана купля музычных інструментаў для дзіцячай школы мастацтваў, а таксама ганчарнага круга для аддзела рамёстваў і традыцыйнай культуры, выданне ілюстраванага альбома "рамеснікі памежжа". Акрамя таго, з мэтай знаёмства з культурнымі традыцыямі рэгіёнаў адбудзецца моладзевы абмен: хлопцы з гміны Сувалкі і Ашмянскага раёна прымуць удзел у музычных і рамесных майстар-класах і адкрытым фестывалі на тэрыторыі Польшчы «Купальская ноч».
     Бюджэт праекта, прадугледжаны для рэалізацыі мерапрыемстваў нашага боку, складае 26465 еўра, прычым 90 працэнтаў фінансуецца са сродкаў Еўрасаюза, 10-раённым бюджэтам.

Людміла Рыбік.

Фота Святланы МУЦЯНСКАЙ.