Такую думку старшыня Ашмянскага раённага Савета дэпутатаў Мікалай Квяткевіч, абраны дэлегатам VI Усебеларускага народнага сходу, выказаў падчас уручэння стыпендый таленавітым ашмянскім спартсменам, якія дасягнулі значных вынікаў у 2020 годзе.
Уладальнікамі стыпендыі сталі студэнтка другога курса Беларускага дзяржаўнага ўніверсітэта Карына Несцерава, вучаніца 10 класа сярэдняй школы №1 імя М.М. Гружэўскага Дар’я Місюкевіч, вучань 9 класа Лідскага філіяла Гродзенскага вучылішча алімпійскага рэзерву Даніэль Жабінскі. Дарэчы, Карыне і Дар’і стыпендыя назначаецца другі год запар — дзяўчаты паспяхова выступаюць на спаборніцтвах па лёгкай атлетыцы. У мінулым годзе Карына папоўніла скарбонку сваіх дасягненняў другім і трэцім месцамі на першынствах краіны. Дар’я ў свой актыў запісала «срэбра» на рэспубліканскім шматбор’і «Здароўе» і другое месца на першынстве Беларусі па лёгкай атлетыцы.
Гонар вучылішча, у якім зараз навучаецца, а таксама Ашмянскага раёна і роднай дзіцяча-юнацкай спартыўнай школы, якія далі пуцёўку ў спартыўнае жыццё, адстойваў Даніэль Жабінскі. Яго вынікам сталі першае і другое месцы на рэспубліканскіх спартакіядах па цяжкай атлетыцы.
— Менавіта для таго, каб падтрымаць ваш імпэт, каб спартыўныя дасягненні моладзі раслі і ў далейшым, згодна з адпаведнай Пастановай Савета Міністраў камісія Ашмянскага райвыканкама штогод прызначае стыпендыі спартсменам нацыянальных і зборных Беларусі, а таксама спартыўнаму рэзерву, — адзначыў Мікалай Квяткевіч. — Вялікая ўвага надаецца ў раёне і ўмацаванню матэрыяльна-тэхнічнай базы, неабходнай для развіцця спорту. Значным попытам у ашмянцаў карыстаюцца два гарадскія стадыёны, а таксама сучасны фізкультурна-аздараўленчы комплекс, які да таго ж рэгулярна збірае абласныя турніры па гандболе і іншыя рэгіянальныя, рэспубліканскія і нават міжнародныя спаборніцтвы. Добрыя магчымасці для заняткаў спортам ёсць і ў вясковых дзяцей: у некалькіх аграгарадках узведзены сучасныя спартыўныя пляцоўкі, а таксама пласкасныя збудаванні.
Дзякуючы такой увазе з боку дзяржавы да спартыўных заняткаў далучаецца ўсё больш насельніцтва, не кажучы ўжо пра дзіцячы і юнацкі спорт, які з’яўляецца першай прыступкай да спорту высокіх дасягненняў. Упэўнены, што тэма падтрымкі таленавітай моладзі застанецца адным з прыярытэтаў развіцця нашай краіны і абавязкова прагучыць падчас VI Усебеларускага народнага сходу, — падкрэсліў дэлегат.
Своеасаблівым пацвярджэннем думак Мікалая Уладзіміравіча стала яшчэ адна прыемная навіна для спартсменаў Ашмяншчыны — легкаатлетка Валянціна Чымбар з Гальшан стала стыпендыятам Прэзідэнцкага спартыўнага клуба.
АВ