У Ашмянах святкуюць Дзень Перамогі

79 гадоў таму савецкі народ адсвяткаваў доўгачаканую перамогу, а 9 Мая стаў усеагульным святам, якое аб'ядноўвае беларусаў на працягу дзесяцігоддзяў.

У Дзень Вялікай Перамогі мы аддаём даніну павагі і памяці тым, хто падарыў нам мір і свабоду. Сёлета жыхароў і гасцей горада сабрала раённае свята»дарогамі Перамогі". Прадстаўнікі органаў мясцовай улады, вайскоўцы, работнікі ўстаноў і прадпрыемстваў горада, актывісты грамадскіх аб'яднанняў, моладзь выказалі ветэранам словы падзякі і аддалі даніну павагі загінулым на вайне – за іх подзвігі ў імя будучыні краіны.

З прывітальным словам і віншаваннем да жыхароў і гасцей горада звярнуўся старшыня раённага выканаўчага камітэта Уладзіслаў Гершгорын:

- Першымі ўдар фашыстаў прыняла беларуская зямля, якая страціла кожнага трэцяга свайго жыхара. Для выратавання Радзімы патрабаваліся жалезная вытрымка і небывалая самаадданасць. Доблесць нашага народа выяўлялася не толькі на фронце, але і ў тыле, і стала залогам агульнай перамогі.

Мы ганарымся тым, што ў слаўным ваенным летапісе краіны, ёсць доля подзвігаў і нашых землякоў. Тысячы ўраджэнцаў і жыхароў Ашмяншчыны змагаліся з ворагам на франтах Другой сусветнай вайны. Яны абаранялі Маскву і Сталінград, удзельнічалі ў бітве на Курскай дузе, білі ворага на Одэры і Вісле.

У памяць аб загінуўшых, мы штогод прыходзім да Вечнага агню, да помнікаў і абеліскаў, каб аддаць даніну павагі і ўдзячнасці салдатам вайны за нашу мірную працу, за радасць жыцця, за ўсмешкі дзяцей і ўпэўненасць у заўтрашнім дні.

Уладзіслаў Гершгорын акцэнтаваў увагу важнасці захавання гістарычнай памяці, згуртаванні народа і працягу традыцый пераможцаў.

Да віншаванняў далучыўся дэпутат Палаты прадстаўнікоў Нацыянальнага сходу Рэспублікі Беларусь Віталь Ракавец.

Напамінам аб трагедыі ваеннага ліхалецця стала пранізлівая тэатралізаваная пастаноўка і франтавыя песні ў выкананні работнікаў культуры.

"Вальс Перамогі" закружыў ашмянцаў у танцы — акцыю, прапанаваную работнікамі культуры і навучэнцамі, падтрымалі многія гараджане.