У Ашмянскім РАУС падвялі вынікі аператыўна-службовай дзейнасці за 2023 год

Калектыў Ашмянскага раённага аддзела ўнутраных спраў падвёў вынікі аператыўна-службовай дзейнасці за 2023 год. У аператыўнай нарадзе прынялі ўдзел старшыня Ашмянскага райвыканкама Уладзіслаў Гершгорын, намеснік начальніка УУС Гродзенскага аблвыканкама Вячаслаў Строчынскі, пракурор Ашмянскага раёна Сяргей Кавальчук, начальнік Ашмянскага раённага аддзела Следчага камітэта Віктар Мацэвіч, начальнік Ашмянскага міжраённага аддзела Дзяржаўнага камітэта судовых экспертыз Валерый Галамбоўскі.

На абароне бяспекі

Адкрываючы аператыўную нараду, начальнік РАУС Анатоль Шчастный выказаў падзяку прадстаўнікам праваахоўных органаў, а таксама органам мясцовай улады за аказанае садзейнічанне ў забеспячэнні бяспекі грамадзян і абароны дзяржаўных інтарэсаў.

Аналізуючы вынікі службы за мінулы год, Анатоль Станіслававіч адзначыў, што прынятыя аддзелам унутраных спраў арганізацыйныя меры і праведзеныя практычныя мерапрыемствы дазволілі павысіць узровень грамадскай бяспекі і дысцыпліны, забяспечыць грамадскі парадак, своечасова рэагаваць на негатыўныя змены ў дынаміцы і структуры злачыннасці. Так, на тэрыторыі Ашмянскага раёна па выніках 2023 года назіраецца зніжэнне з 307 да 270 зарэгістраваных злачынстваў. У выніку здзяйснення супрацьпраўных дзеянняў пацярпела 175, што на 54 менш, чым у папярэднім годзе.

Не зарэгістравана фактаў згвалтаванняў, прычыненняў цяжкіх цялесных пашкоджанняў, рабаванняў, разбойных нападаў. Знізілася колькасць учыненых на тэрыторыі раёна хуліганстваў, крадзяжоў і махлярстваў.

У сферы сямейна-бытавых адносін (без уліку прэвентыўных артыкулаў), як і ў 2022 годзе, зарэгістравана 2 злачынствы, якія адносяцца да катэгорыі «хатні гвалт».

Прынятыя папераджальныя і прафілактычныя меры, дазволілі знізіць злачыннасць сярод непаўналетніх. Акрамя таго, знізілася колькасць злачынстваў, учыненых асобамі ў стане алкагольнага ап'янення, а таксама асобамі, якія маюць судзімасць. Аднак станоўчыя тэндэнцыі не даюць праваахоўнікам падставы расслабляцца, бо адзначаецца рост злачынстваў (па скончаных крымінальных справах), учыненых замежнымі грамадзянамі.

Заставалася падкантрольнай АУС крымінагенная абстаноўка ў грамадскіх месцах, дзе адзначаецца зніжэнне злачынстваў. Зменшылася колькасць зарэгістраваных злачынстваў і ў сельскай мясцовасці.

Па накіраванні барацьбы з карупцыяй і эканамічнымі злачынствамі зарэгістравана 16 крымінальна каральных дзеянняў.

Па накіраванні дзейнасці наркакантролю і супрацьдзеянні гандлю людзьмі выяўлена 21 крымінальна каральная дзея, у тым ліку 7 злачынстваў, якія адносяцца да катэгорыі цяжкіх і асабліва цяжкіх. На 30 працэнтаў павялічылася колькасць выяўленых злачынстваў, непасрэдна звязаных з незаконным абаротам наркатычных сродкаў, псіхатропных рэчываў, іх прэкурсораў і аналагаў.

У сферы процідзеяння кіберзлачыннасці зарэгістравана

36 злачынстваў, з іх 27 звязаныя з крадзяжамі маёмасці шляхам мадыфікацыі камп'ютарнай інфармацыі.

Што тычыцца сферы бяспекі дарожнага руху, начальнік РАУС Анатоль Шчастный вымушаны быў канстатаваць павелічэнне з 11 да 12 дарожна-транспартных здарэнняў, у якіх 4 чалавекі загінула і 12 чалавек атрымалі раненні.

Падводзячы вынік праведзенай работы, намеснік начальніка УУС Гродзенскага аблвыканкама Вячаслаў Строчынскі адзначыў, ашмянскія вартавыя правапарадку па шэрагу напрамкаў дасягнулі важкіх вынікаў. Аднак строгая дысцыпліна і парадак дазволяць палепшыць дынаміку.

За заслугі

Па выніках нясення службы за мінулы год праваахоўнікам, якія дасягнулі лепшых вынікаў, былі ўручаны ўзнагароды.

За добрасумленную працу, дасягненне высокіх паказчыкаў у службовай дзейнасці старшыня райвыканкама Уладзіслаў Гершгорын уручыў Ганаровую грамату Ашмянскага райвыканкама начальніку інспекцыі па справах непаўналетніх міліцыі грамадскай бяспекі Вадзіму Кліму, старэйшаму оперупаўнаважанаму групы па наркакантролі і супрацьдзеянні гандлю людзьмі крымінальнай міліцыі Аляксандру Савенку, оперупаўнаважанаму аддзялення крымінальнага вышуку крымінальнай міліцыі Мікалаю Сасіму.

Падзячны ліст старшыні Ашмянскага райвыканкама прымалі памочнік дзяжурнага аператыўна-дзяжурнай службы міліцыі грамадскай бяспекі Яўген Барткевіч, міліцыянт ізалятара для часовага ўтрымання асоб затрыманых або зняволеных пад варту міліцыі грамадскай бяспекі Антон Вайнюш, міліцыянт-кіроўца аператыўна-дзяжурнай службы міліцыі грамадскай бяспекі Іван Лычкоўскі.

Нагрудным знакам Міністэрства ўнутраных спраў» за заслугі " ўзнагароджаны старшы ўчастковы інспектар міліцыі Андрэй Міцкевіч. Грамата начальніка УУС уручана начальніку ізалятара часовага ўтрымання Дзмітрыю Грыгаруку. Падзяка начальніка УУС аб'яўлена інспектару аддзялення па грамадзянстве і міграцыі Андрэю Матылевічу.

Шэрагу супрацоўнікаў аддзела ўнутраных спраў прысвоены чарговыя спецыяльныя званні.

Голас кожнага важны

Асаблівая ўвага падчас нарады была ўдзелена пытанням падрыхтоўкі да правядзення адзінага дня галасавання. Як адзначыў старшыня райвыканкама Уладзіслаў Гершгорын, 25 лютага беларусам трэба будзе выбраць дэпутатаў усіх узроўняў – у Палату прадстаўнікоў і мясцовыя Саветы дэпутатаў.

Пасля завяршэння этапу вылучэння кандыдатаў у дэпутаты і іх рэгістрацыі пачнецца агітацыйная кампанія. У лютым яна набярэ асаблівыя абароты і дазволіць загадзя пазнаёміцца з кожным з кандыдатаў.

Размаўляючы з праваахоўнікамі з нагоды электаральнай кампаніі, кіраўнік раёна звярнуў увагу на дзве найважнейшыя катэгорыі-законнасць і парадак. Яны будуць пастаўлены ў аснову пры правядзенні Адзінага дня галасавання.