У Дзень Незалежнасці Рэспублікі Беларусь ля брацкай магілы ў Ашмянах прайшоў мітынг

У мітынгу ля брацкай магілы ў гарадскім парку прынялі ўдзел прадстаўнікі органаў мясцовай улады на чале са старшынёй райвыканкама Уладзіславам Гершгорыным, дэпутат Палаты прадстаўнікоў Нацыянальнага сходу Рэспублікі Беларусь Аляксандр Маркевіч, дэпутацкі корпус раёна, прадстаўнікі грамадскіх аб’яднанняў, працоўных калектываў, духавенства, моладзь, каб узгадаць тых, хто цаной свайго жыцця выканаў доўг па абароне Айчыны, хто падарыў нам магчымасць жыць пад мірным небам у незалежнай краіне, працаваць і развіваць свае здольнасці, памнажаць дабрабыт Беларусі. Да мітынгу далучыўся малалетні вязень фашысцкіх лагераў Васіль Жаўняк.

Пасля ўрачыстага выканання Дзяржаўнага гімна Рэспублікі Беларусь да прысутных звярнуўся старшыня раённага аб’яднання ветэранаў палкоўнік у адстаўцы Уладзімір Бельчанка.

— Мы адзначаем сёння галоўнае свята нашай краіны – Дзень Незалежнасці Рэспублікі Беларусь і Дзень вызвалення Беларусі ад нямецка-фашысцкіх захопнікаў. У гэтыя святочныя дні мы аддаём даніну павагі пераможцам, схіляем галовы перад іх подзвігам, успамінаем пайменна тых, хто аддаў жыццё ў барацьбе за свабоду Радзімы. У памяць аб загінуўшых мы прыходзім да Вечнага агню, брацкіх магіл і помнікаў воінскай славы, на якіх высечаны імёны пераможцаў, — адзначыў Уладзімір Бельчанка. — Сёння ля брацкай магілы воінаў, якія вызвалялі наш раён ад нямецка-фашысцкіх захопнікаў, мы выражаем падзяку загінуўшым і жывым ветэранам Вялікай Айчыннай. Яны, як і раней, застаюцца ў нашых сэрцах сапраўднымі патрыётамі сваёй Айчыны.

Уладзімір Бельчанка нагадаў аб тым, што ў нашай краіне ўдзяляецца вялікая ўвага захаванню гістарычнай памяці, недапушчэнню рэабілітацыі нацызму і прывёў вытрымку з прамовы Прэзідэнта нашай краіны: “Пакуль у краінах, якія Савецкая Армія вызваляла ад фашызму, руйнуюць магілы нашых дзядоў і прадзедаў – тут, на беларускай зямлі, мы будзем будаваць новую Беларусь, паднімаць архівы і ўзнаўляць гісторыю кожнага воіна, кожнай бязвіннай ахвяры вайны…”

Доўг маладога пакалення – памятаць аб трагічных падзеях ваенных гадоў, беражліва захоўваць праўду аб вайне і не дапускаць яе скажэння, адзначыў у сваім выступленні старшыня Маладзёжнага парламенту пры Ашмянскім раённым Савеце дэпутатаў Дзяніс Абашкін.

Напамінам аб недапушчэнні вайны прагучала песня ў выкананні вучаніцы СШ №2 Марыі Вараб’ёвай.

Мінутай маўчання ўдзельнікі мітынгу ўшанавалі памяць усіх, хто не вярнуўся з франтоў, хто на полі бою і ў тыле набліжаў Вялікую Перамогу. Завяршыўся мітынг ускладаннем кветак і вянкоў да падножжа помніка загінуўшым воінам.