У мерапрыемствах дабрачыннай акцыі "Нашы дзеці" на Гродзеншчыне прымуць удзел каля 150 тысяч дзяцей

У мерапрыемствах дабрачыннай акцыі "Нашы дзеці" на Гродзеншчыне прымуць удзел каля 150 тысяч дзяцей

Далучыцца да ўдзелу ў акцыі могуць усе ахвочыя.

Традыцыйная акцыя "Нашы дзеці" пройдзе ва ўсіх раёнах Гродзенскай вобласці з 15 снежня па 15 студзеня. За гэты перыяд адбудзецца цэлы комплекс мерапрыемстваў, удзельнікамі якога стануць каля 150 тысяч дзяцей. Па традыцыі, асаблівая ўвага будзе ўдзелена дзецям, якія засталіся без апекі бацькоў, дзецям, якія выхоўваюцца ў дзіцячых дамах, інтэрнатах, а таксама дзецям-сіротам, дзецям-інвалідам і дзецям, якія аказаліся ў цяжкай жыццёвай сітуацыі.

Галоўны спецыяліст аддзела выхаваўчай і сацыяльнай работы галоўнага ўпраўлення адукацыі аблвыканкама Вольга Ханевіч расказала, што ў рэгіёне актыўна ідзе падрыхтоўка да навагодніх мерапрыемстваў. Ужо гатовы запрашальныя білеты, закупляюцца салодкія пачастункі для юных гасцей святочных урачыстасцей.

  - Далучыцца да ўдзелу ў дабрачыннай акцыі "Нашы дзеці" могуць усе неабыякавыя грамадзяне. Па традыцыі актыўны ўдзел у віншаванні дзяцей прымуць прадстаўнікі органаў улады, дэпутацкага корпуса, грамадскіх аб'яднанняў. Для юных удзельнікаў абласных навагодніх мерапрыемстваў будзе закуплена больш за 1300 салодкіх падарункаў. Усяго на правядзенне абласных мерапрыемстваў у рамках акцыі выдзелена 67 000 рублёў, - сказала Вольга Ханевіч.

Вольга Ханевіч таксама расказала, што абласны навагодні баль, на які па традыцыі будуць запрошаны навучэнцы каледжаў і студэнты вышэйшых навучальных устаноў, адбудзецца ў Гродне 21 снежня. Мерапрыемства пройдзе на базе абласной філармоніі.

А 27 снежня таксама ў філармоніі пройдзе абласное дабрачыннае свята з удзелам старшыні Гродзенскага аблвыканкама. На мерапрыемства запросяць больш за 800 хлопчыкаў і дзяўчынак з розных куткоў Гродзеншчыны.

Па традыцыі дзеці з гродзенскага рэгіёну прымуць удзел у дабрачынным свяце з удзелам Прэзідэнта. Мерапрыемства адбудзецца 27 снежня. Ад Гродзеншчыны туды адправяцца 100 хлопчыкаў і дзяўчынак. Гэта пераможцы конкурсаў і алімпіяд, выхаванцы абласнога кадэцкага вучылішча, а таксама дзеці-інваліды, дзеці са шматдзетных сем'яў, дзеці-уцекачы.

28 снежня ў Палацы Незалежнасці пройдзе традыцыйны Рэспубліканскі навагодні баль, які аб'яднае некалькі соцень прадстаўнікоў навучэнскай моладзі з усіх рэгіёнаў краіны. Ад Гродзенскай вобласці на баль адправяцца 26 удзельнікаў.

Завершыць шэраг святочных мерапрыемстваў навагодні паказ для дзяцей-сірот, дзяцей, якія засталіся без апекі бацькоў, дзяцей са шматдзетных і малазабяспечаных сем'яў. Яны будуць запрошаны на свята 5 студзеня ў Палац Незалежнасці. Ад Гродзенскай вобласці туды паедуць 50 чалавек.

Дарэчы

Сёлета разам з дабрачыннай акцыяй "Нашы дзеці" пройдзе акцыя "Ад усёй душы". Яна стартуе на Гродзеншчыне 3 студзеня і працягнецца да 15 студзеня. Клопатам і ўвагай будуць акружаны прадстаўнікі старэйшага пакалення, якія знаходзяцца ў стацыянарных установах сацыяльнага абслугоўвання, а таксама пенсіянеры, якія жывуць адзінока.