Прафсаюзы Гарадзеншчыны прынялі актыўны ўдзел у падрыхтоўцы дзяцей да новага навучальнага года

   Па папярэдняй інфармацыі ў гэтым годзе ў рамках дабрачыннай акцыі «Прафсаюзы – дзецям» для падрыхтоўкі дзяцей да школы прафсаюзныя арганізацыі рэгіёну накіравалі больш за 300 тысяч рублёў. Як распавяла загадчыца аддзела сацыяльнага партнёрства і працоўных адносін Гродзенскага абласнога аб'яднання прафсаюзаў Марына Арцыман, у акцыі прынялі ўдзел практычна ўсе першасныя прафсаюзныя арганізацыі, галіновыя камітэты і аб'яднанні прафсаюзаў. 

   «У першую чаргу мы аказалі дапамогу тым, хто ў ёй асабліва мае патрэбу. Гэта шматдзетныя і маламаёмныя сем'і, дзеці-сіроты, сем'і, якія выхоўваюць дзяцей-інвалідаў або якія апынуліся ў цяжкім становішчы. Матэрыяльную і фінансавую падтрымку таксама атрымалі падшэфныя дзіцячыя сацыяльныя прытулкі, школы-інтэрнаты, дамы сямейнага тыпу», – адзначыла Марына Арцыман.

   Упершыню да акцыі далучыліся моладзевыя актывісты прафсаюзаў. Прадстаўнікі Моладзевага савета Гродзенскага абласнога аб'яднання прафсаюзаў наведалі Шчучынскі раённы сацыяльна-педагагічны цэнтр, дзе на дадзены момант выхоўваюцца 10 хлопчыкаў і дзяўчынак. Ад прафсаюза хлопцам уручылі неабходныя канцылярскія тавары, школьныя прыналежнасці, настольныя гульні і ровар. Не абышлося і без свята. Хлопцы прадэманстравалі гасцям свае творчыя здольнасці, спявалі, танцавалі, разам весяліліся. 

Ўключыліся ў акцыю і галіновыя прафсаюзныя арганізацыі. Так, у Дзень ведаў на базе дзіцячага аздараўленчага лагера «Зорька юбілейная» пройдзе свята для першакласнікаў, арганізаваны гарадскім камітэтам прафесійнага саюза работнікаў адукацыі і навукі. У мерапрыемстве прымуць удзел 82 першакласніка са шматдзетных і няпоўных сем'яў. Для хлопчыкаў і дзяўчынак будуць працаваць аніматары, роставыя лялькі, шматлікія гульнявыя пляцоўкі. Школьнікам ўручаць наборы першакласніка на агульную суму каля 3 тысяч рублёў. Сярод запрошаных – 4 двойні. Для гэтых сем'яў гаркам прафсаюза дадаткова вылучыў па 100 рублёў. 

   Незвычайную акцыю ў падтрымку маленькіх падапечных Гродзенскага дзіцячага хоспіса праводзяць у рэгіянальным аддзяленні ААТ «БанкБелВЭБ». Напярэдадні пачатку навучальнага года ў банку праходзіць выстава, прысвечаная праблемам хворых на анкалогію. Адначасова ідзе збор сродкаў для хлопчыкаў і дзяўчынак, якія змагаюцца з гэтым цяжкім хваробай.

     Дапамога сем'ям, якія выхоўваюць дзяцей школьнага ўзросту, аказана і прафкамамі прадпрыемстваў і арганізацый, у якіх працуюць бацькі. Да прыкладу, у лідскім ААТ «ТПФ «Ліда» усім першакласнікам, а іх у арганізацыі 22, уручылі першыя партфелі і пісьмовыя прыналежнасці на агульную суму больш за 600 рублёў.

   Таксама ў многіх калектыўных дагаворах прадпрыемстваў закладзены нормы па аказанні матэрыяльнай дапамогі бацькам, якія выхоўваюць дзяцей-школьнікаў. І гэтыя нормы выконваюцца. Так, па тры базавых велічыні на кожнага дзіцяці атрымалі 38 фармацэўтычных работнікаў Гродзенскага РУП «Фармацыя». Агульная сума выплат склала 3726 рублёў з фонду прадпрыемства, столькі ж выдзеліў прафсаюзны камітэт. 

   Варта адзначыць, што з кожным годам памер матэрыяльнай і фінансавай падтрымкі, якую аказваюць прафсаюзы, расце. Так, у 2016 годзе ў цэлым па рэспубліцы на гэтыя мэты было накіравана больш за 2 млн. рублёў.