95-гадовы юбілей адзначыла ветэран Вялікай Айчыннай вайны

   Ветэран Вялікай Айчыннай вайны Таццяна Сцяпанаўна Мягкова адзначыла юбілейны Дзень нараджэння. Ён быў напоўнены шчырымі віншаваннямі, кранальнымі сюрпрызамі і кветкамі, якія ў гэтую пару маюць шмат яркімі фарбамі і падымаюць настрой.
   Віншаванні прымала Таццяна Сцяпанаўна ад старшыні райвыканкама Уладзіслава Гершгорына і яго намесніка, старшыні раённай арганізацыі РГА "Белая Русь" Наталлі Станкевіч, старшыні раённага Савета ветэранаў Уладзіміра Бельчанкі, старшыні раённай арганізацыі Беларускага саюза жанчын Марыны Куліковіч, ваеннага камісара Ашмянскага раёна Ігара Місюкевіча. Ад раённага аб'яднання прафсаюзаў пажаданні юбіляру выказала Галіна Яшына-старшыня раённай арганізацыі прафсаюза работнікаў дзяржаўных і іншых устаноў.
   У ліку першых павіншавалі ветэрана работнікі тэрытарыяльнага цэнтра сацыяльнага абслугоўвання насельніцтва, а таксама сацыяльны работнік Ядвіга воўна, якая дапамагае Таццяне Сцяпанаўне ў вырашэнні бытавых пытанняў. Спецыялісты цэнтра падрыхтавалі тэатралізаванае віншаванне з вершамі і песнямі.
   Заўсёды рада Таццяна Сцяпанаўна зносінам з дзецьмі. У гэты знамянальны дзень пажаданні здароўя і словы падзякі за мірнае неба над нашай Радзімай гучалі з вуснаў падрастаючага пакалення нашага раёна-вучняў гімназіі №1, да якіх далучыліся выкладчыкі і старшыня райкама прафсаюза работнікаў адукацыі і навукі Аляксей Дэрвіс.
   Цэлы дзень у кватэры ветэрана гучалі душэўныя віншаванні, раз-пораз тэлефанаваў тэлефон. Здавалася, што ўвесь горад вырашыў далучыцца да прыгожага свята прыгожай жанчыны, якая, нягледзячы на ўзрост, заўсёды з аптымізмам глядзіць на свет і шчодра дзеліцца душэўнай дабрынёй з навакольнымі.


Ашмянскі Веснік