У гімназіі № 1 адкрыўся навучальны цэнтр "Пульс" Ашмянскай раённай арганізацыі БТЧК

   На мінулым тыдні ў гімназіі № 1 адбылося адкрыццё навучальнага цэнтра "Пульс" Ашмянскай раённай арганізацыі БТЧК. У ім прынялі ўдзел старшыня раённай арганізацыі Вольга БАРЫСЕНКА-Рабко, галоўная медыцынская сястра Гродзенскай абласной арганізацыі БТЧК Алена Гарбачэўская і спецыяліст па навучанні Алена Паўлянковіч, начальнік упраўлення адукацыі Ашмянскага райвыканкама Святлана Баркоўская, дырэктар гімназіі № 1 Вольга Саванец, а таксама работнікі ТЦСАН Ашмянскага раёна і цэнтральнай бальніцы.
   Не выпадкова цэнтр размясціўся ў гімназіі № 1, бо ўстанова можна смела назваць "кузняй" валанцёраў. Як адзначыла Вольга Саванец, на працягу некалькіх гадоў гімназія працуе над развіццём здароўезберагальнага асяроддзя ўстановы. Гімназісты адны з першых прынялі ўдзел у інавацыйным праекце "Роўны навучае роўнага" і распрацавалі аналагічныя ініцыятывы. Акрамя гэтага, ва ўстанове дзейнічае валанцёрскі атрад "Вясёлка", актывісты якога з'яўляюцца пастаяннымі ўдзельнікамі розных акцый і мерапрыемстваў. Установа адукацыі выпусціла 28 навучаных валанцёраў-інструктараў, якія працягваюць справу дабра і міласэрнасці за сценамі школы.
- Навучанне насельніцтва навыкам аказання першай дапамогі з'яўляецца адным з прыярытэтных напрамкаў дзейнасці Чырвонага Крыжа — - адзначыла спецыяліст па навучанні Гродзенскай абласной арганізацыі БТЧК Алена Паўлянковіч. - Наяўнасць у насельніцтва спецыяльных ведаў і навыкаў важна, бо правільна аказаная першая дапамога скарачае час лячэння, спрыяе найхутчэйшаму гаенню ран і часта з'яўляецца вырашальным фактарам пры выратаванні жыцця пацярпелага. Упэўненая, што навучальны цэнтр «Пульс» стане не толькі месцам правядзення трэнінгаў па доглядзе дома, аказанні першай дапамогі і здароваму ладу жыцця, а будзе паўнапраўным цэнтрам падрыхтоўкі валанцёраў.
   У новым цэнтры плануецца навучаць навыкам аказання першай дапамогі не толькі гімназістаў, але і жыхароў раёна. У якасці выкладчыкаў выступяць трэнеры па аказанні першай дапамогі і па прафілактыцы неінфекцыйных захворванняў. Групы навучэнцаў, у першую чаргу, будуць фармавацца з ліку першасных арганізацый Чырвонага Крыжа, якія дзейнічаюць на прадпрыемствах і ў арганізацыях горада і раёна. Разам з тым далучыцца да сям'і валанцёраў могуць усе жадаючыя з ліку жыхароў раёна, незалежна ад іх роду дзейнасці. Навучанне будзе праходзіць на бязвыплатнай аснове.
   Навучальны цэнтр "Пульс" абсталяваны не толькі метадычнымі матэрыяламі, якія будуць пастаянна абнаўляцца: тэхнічнае абсталяванне таксама на ўзроўні – анатамічныя манекены і прадметы для аказання першай дапамогі да паслуг валанцёраў.
   Пакуль цэнтр будзе складацца з аднаго прасторнага памяшкання, але ўжо праз паўгода ён зменіцца - будуць адкрыты яшчэ пакоі, дзе маладыя валанцёры змогуць збірацца разам, дзяліцца вопытам, праходзіць урокі медыцынскай падрыхтоўкі і вучыцца аказваць першую дапамогу.
   Першымі ацанілі аснашчэнне цэнтра удзельнікі валанцёрскага атрада «Вясёлка». Таксама ва ўрачыстай абстаноўцы квіткі валанцёра атрымалі Вольга Саванец, Вольга Куліковіч, Юрый Барташэвіч, Максім Гайдановіч, Дар'я Бернат, Антон Багумінскі, Валерыя Губарава, Ягор Саванец і Дар'я Дзенісенка.
   У завяршэнне мерапрыемства спецыялісты абласной арганізацыі БТЧК правялі для прысутных майстар-клас па аказанні першай дапамогі. Гэта далёка не апошні занятак у новым навучальным цэнтры "Пульс".

Ашмянскі Веснік